Tuesday, 8 June 2021

அறிமுக தத்துவவியல் - 4. தத்துவவியலின் உள்ளடக்கம் - V.R. கணேஷ் சந்தர் மற்றும் K.K. கங்காதரன்

 

அறிமுக தத்துவவியல்

V.R. கணேஷ் சந்தர் மற்றும் K.K. கங்காதரன்

தொடக்கம் 30.5.2021

 

4. தத்துவவியலின் உள்ளடக்கம்




தொடரும் ...

Sunday, 6 June 2021

அறிமுக தத்துவவியல் - 3. அடி விழுந்தாலும் சந்தோஷம் - V.R.கணேஷ் சந்தர் மற்றும் K.K.கங்காதரன்

 

அறிமுக தத்துவவியல்

V.R.கணேஷ் சந்தர் மற்றும் K.K.கங்காதரன்

தொடக்கம் 30.5.2021

          3. அடி விழுந்தாலும் சந்தோஷம்

தத்துவவியலைக் கேள்வி கேட்டு பல வாதங்கள் முன்வைக்கப்பட்டன. தத்துவவியல் அவைகளையும் தன் எல்லைக்கோட்டில் வைத்து அழகு பார்க்கிறது. ஏனென்றால்,

·          இறைமையை ஒப்புக்கொள்ள ஒரு தத்துவம்

·          இறைமையை மறுக்க ஒரு தத்துவம்

·          தத்துவத்தை மறுத்தால் அதுவும் ஒரு தத்துவம்

1 புலனெல்லை அறிவு வாதம் – Positivism.

Positivism என்ற வார்த்தையில் உள்ள Positive என்ற மூலவார்த்தைக்கு “positive Thinking” என்பதில் வருவது போன்று “நம்பிக்கை” என அர்த்தம் கொள்ளக்கூடாது. இங்கு positive என்றால் position என்பதாக அர்த்தம் செய்ய வேண்டும். மனிதன் அறியும் ஒரு விஷயம் அவன் புலன்களில் ஏற்படுத்தும் ஓர் அதிர்வு வரை அது உண்மை. அவைகளைத் தாண்டி ஏதேனும் கற்பிதம் செய்வதும் விவாதம் செய்வதும் வீண். அவ்விஷயத்துடன் புலன்கள் கொள்ளும் position தான் Positivism.

தத்துவத்தின் வேர்மூலத்தையே ஆட்டிவைப்பதான இதுவும் ஒரு தத்துவம்.

2 சந்தேகவாதம் – Scepticism

பழங்காலத்தில் இதற்கு இருந்த அர்த்தத்தை முதலில் பார்ப்போம். பிறகு இதன் தற்கால உருமாற்றத்தை அறியலாம்.

முற்காலத்தில், இறைமையையும் ஆன்மீகத்தையும் முன்னிலைப் படுத்தி, வாழ்வில் வரும் அச்சங்களை வென்று அமைதிப்படுத்த இறைக் கருத்து போதித்த தத்துவங்களை விலக்கி, இறைமை, ஆன்மா என இவ்விரண்டும் தவிர பிற வகைகளில் விளக்கம் தந்த அமைதிப்படுத்த சிந்தித்தவர்கள் இறைமையல்லாத பல தத்துவங்களை முன் வைத்தனர். அவர்கள் இறைமையை சந்தேகப்பட்டதால் சந்தேகவாதம் எனும் கருத்து உருவானது.

தற்போது, சந்தேகவாதத்தின் நவீன உருவம் என்னவென்று பார்ப்போம்.

அதாவது இறைமையோ இறைமை மறுப்போ சிந்தனையாளர்கள் ஆயிரம் சொல்லிவிட்டுப் போகட்டும். முன் நிற்கும் துயரமே சத்யம். அதிலிருந்து தப்பித்து ஓடும் இதய பலவீனக்காரனா மனிதன் ? தத்துவங்கள் பல. எது சரியென சந்தேகத்துடன் ஆராய். மனிதத்தீர்ப்பு ஒருவேளை மூடத்தனமாக இருக்கலாம். எது சரியான தீர்ப்பு என சந்தேகத்துடன் ஆராய். புலன்கள் ஏமாற்றலாம். ஏமாறாதிருக்க என்ன செய்யலாம் என சந்தேகத்துடன் ஆராய். இவைகளைத்தான் இக்கால சந்தேக வாதம் முன்வைக்கிறது. இது மனிதத் துயரத்தை மனிதனே நேர்சந்திப்பில் தீர்க்கப் பார்ப்பது. யாரோ பார்த்துக் கொள்ளட்டும் என பொறுப்பு கை நழுவவிடுவதல்ல.

3 அறியவொணா வாதம் Agnosticism

புலப்படும் மூலகங்களைக் கொண்டு அவைகளின் மூலங்களைக் காண முடியாது எனக்கூறும் வாதம். இது மூலத்தை மறுக்காமல் ஆனால் அதனிடன் தகுதியின்றி அணுகுவதைத் தடுக்கிறது.

 

தத்துவவியலின் ஆதாரப் பிடிமானம்

அறிவியலின் ஒரு விசித்திரப் போக்கு என்னவென்றால் அது மனிதனால் தோற்றுவிக்கப்பட்டு மனிதனைத் தோற்கடிக்கத் தெரிந்த ஒன்று.

அறிவியல் கண்டுபிடிப்புகள் ஆக்கபூர்வ வாழ்க்கைக்கு எனக் கூறப்பட்டு ஆரம்பித்திருத்தாலும், நடந்து முடிந்த போர்கள் அனைத்தும் அறிவியலின் அழிவுப் பக்கத்தைப் பார்த்துவிட்டன. இப்போது கேள்வி என்ன எழுகிறது என்றால், அறிவியலை அழிவுப்பாதைக்குப் பயன்படுத்தாத ஒழுக்கம் மனிதனுக்கு எது கற்றுக் கொடுக்கும்? இதற்கு தத்துவவியலில்தான் விடை இருக்கிறது.

தத்துவம் பற்றிய உலகக் கண்ணோட்டம்

தத்துவம் என்றால் என்ன எனும் கேள்விக்கு மாணவர்களின் பதில்கள். ஆனால் அவைளில் சில சரியல்ல., சில பகுதி சரி,

1.   எந்தக் கேள்விக்கும் அல்லது பிரச்னைக்கும் தர்க்க ரீதியான பதில்

2.   வாழ்வின் அர்த்தம் மற்றும் அதனை எதிர்கொள்ளும் வழி

3.   அனுபவம் மற்றும் தீர்ப்பு அடிப்படையிலான நம்பிக்கைகளும் நடத்தைகளும்

4.   மக்களின் வெவ்வேறு நோக்குகளும் நம்பிக்கைகளும்

5.   தனிமனித அபிப்பிராயங்கள்

6.   ஒரு மனச் சட்டகம்

7.   ஞானிகளின் போதனை

8.  ஒருவனின் நுண்ணறிவுத் திறமைகளைக் கையாளும் விதம்

9. ஒழுக்க விதி மற்றும் பகுத்தறிவின் அடிப்படையிலான கண்ணோட்டம்

10. சிந்திக்க, விவாதிக்க, பகுத்தறியச் சொல்லிக்கொடுக்கும் கலை,

11.  கூட்டச்சிக்கலாய் இருக்கும் ஒரு விஷயத் தொகுப்பை எளிய பகுதிகளாக எல்லா கோணங்களிலிருந்தும் தொகுத்துக் கூறுவதான ஒரு மொழிபெயர்ப்பு

12.  பரம்பரை, பரம்பரையாக இறக்கிவிடப்படும் நம்பிக்கைகள், கதைகள், சடங்குகள், அனுபவஙக்ள்.

இவர்களில் எத்தனை பேர் தங்களின் கருத்துக்களை சரியானவையா இல்லையா என பிறரிடம் விவாதித்திருப்பார்கள்? விவாதித்திருந்தால் தத்துவத்தின் முதல் படி எடுத்து வைத்து விட்டதாக எடுத்துக் கொள்ளலாம். இன்றைய இளைஞனிடம் அவனுடைய தந்தை கொடுக்கக் கூடிய மிகப் பெரிய சொத்து இது எனலாம். அதாவது எதனையும் –- தன்னுடைய தலையாட்டிகளிடம் மட்டுமல்ல -- நானாவித மக்களிடம் விவாதித்து அறியும் ஆவலை கடைசி விடாதிருத்தல்.

உலகக் கண்ணோட்டம் என்பது தத்துவத்தின் தனிமனிதக் கையடக்கப் பிரதி.

தொடரும் ....

Tuesday, 1 June 2021

அறிமுக தத்துவவியல் - 2. கேள்விதான் நிரந்தர பிரச்னை என்றால், சிந்தனைதான் நிரந்தர பதில் - V.R.கணேஷ் சந்தர் மற்றும் K.K.கங்காதரன்

 

அறிமுக தத்துவவியல்

V.R.கணேஷ் சந்தர் மற்றும் K.K.கங்காதரன்

தொடக்கம் 30.5.2021

 2. கேள்விதான் நிரந்தர பிரச்னை என்றால், சிந்தனைதான் நிரந்தர பதில்

(ஏனென்றால், பதில்கள் பிறந்து இறப்பவை. கேள்வியும் சிந்தனைகளும்தான் சாகாவரம் பெற்றவை)

நம்மிடம் பல கேள்விகள் இருக்கின்றன.

உதாரணத்திற்கு

  • எது சரியான அரசாட்சி?
  • எது சரியான சமூக, பொருளாதாரக் கட்டமைப்பு?
  • இறைவன் இருக்கிறானா?
  • ஆன்மாவின் இருப்பும் அதன் இலக்கும்
  • முந்தைய சந்ததியினரைக் காட்டிலும் இக்காலச் சந்ததியினர் நடத்தையில் முன்னேறியிருக்கிறார்களா?

இவைகளுக்கு இதுதான் விடை! என எந்தக் கேள்விக்கும் தனி ஒரு விடை கூறமுடியுமா?

விடைகள் பலவாக இருக்கும் போது, அறிவியல் அவ்விடைகளிடையே ஒன்றைக் கணக்கிட்டு இதுதான் சரியானது எனக் கூறினாலும், காலப்போக்கில் அது சரியானது அல்ல என அனுபவமே காட்டிக் கொடுக்கிறது. என்றால் அந்த அறிவியலே கேள்விக்குரியது ஆகிறது அல்லவா?

இப்படி இருக்கும் போது,, என்ன செய்வது என்பதைவிட என்ன செய்துவிடக்கூடாது என அறியலாம். அதாவது சந்தேக மனோபாவத்தைக் (Scepticism) கைகொள்ளாமை இன்னும் மோசமாகச் சொல்வதென்றால் எதையும் எதிர்த்து எரிந்து விழுதலைக் Cynicism) கை கொள்ளாமை.

ஓர் அறிவியல்பூர்வ மனிதனுக்கு இது சகஜம்தான். ஆனால் தத்துவபூர்வ மனிதனோ ஒரு விஷயத்தை ஊடுருவிச் சிந்திப்பது அல்லது ஊடுருவிச் சிந்திப்பதற்கு முயற்சிப்பது என்பதைத் தன் ஆளுமையில் (personality) கலந்துவிட்டவன். அறிவியல் அன்றைய அறிவின் ஊடுருவல் வரை ஒன்றை உண்மை அல்லது உண்மையல்ல எனக் கூறும். ஆனால், தத்துவம் அந்த அறிவின் ஊடுருவல் மனிதனுடன் வளரக்கூடியது என்பதையும் கணக்கிடுகிறது. எனவே, தத்துவம் என்பது தீர்க்க சிந்தனை (Reflective thinking) பற்றிய அறிவியலாகும்.

சிந்தித்து சிந்தித்து விடைகண்டு குடும்பம் நடத்தும் அதன் தலைவனாகிய தந்தையின் சிந்தனையை அறியாமல் குழந்தை எல்லாவற்றிற்கும் விடை இருப்பதாக ஒரு கற்பனையில் விளையாடிக் கொண்டே இருக்கிறது.

எது சிறந்த காலம்? எல்லாவற்றுக்கும் விடை இருக்கும் காலமா? எல்லாமே கேள்வியாக உள்ள காலமா? அல்லது இரண்டின் கலப்புடனான காலமா? சிந்திப்பதை முக்கியமாகக் கருதக் கற்றுக்கொடுத்த வாய்ப்பு ஒன்று என்றும் வரலாற்றில் வரவில்லை என்பது பலர் நினைப்பது போல் உண்மை அல்ல. பல வந்திருக்கின்றன. ஆனால், மனிதனின் சுகநாட்டத்தால் அவ்வப்போதிருந்த “நிச்சய” நிலைப்பாடுகளைத் (Condition fixes) தொற்றிக் கொண்டு வாழ்ந்து முடிந்தானேயன்றி சிந்திப்பதை சுகமாகத் தள்ளிப் போட்டுக் கொண்டே வந்தான் என்பதுதான் உண்மை. இன்றளவும் அதுதான் நடக்கிறது.

ஆனால் அவனுடைய சிந்தனை அவனை தன் அறிநிலைக்கும் அதற்கு ஏற்ப உலகக் கண்ணோட்டம் கொள்ளவும் வைக்கிறது. மனிதனுக்கு அறிநிலை (awareness) இருக்கிறது. அதன்படி, அவனுடைய இருப்பு இரண்டு நிலைகளில் இருக்கலாம்.

  • குறை நிலை
  • நன்னிலை

இப்போது மனிதர்களில் எத்தனை விதங்கள் என இதனை வைத்து ஆராயலாம்.

வ. எண்.

மனிதர்களின் வகைகள்

உலகக் கண்ணோட்டம் (world view)

1

குறை திலை, நன்னிலை என இரண்டு இருப்பதை அறியாதவர்கள்

குழந்தை, மூளை மற்றும் மனக்கோளாறு ஊள்ளவர்கள்.  அறியாமையே ஆனந்தம்

2

அறிந்தாலும் குறைநிலையிலிருந்து நன்னிலை நோக்கி முன்னேற விரும்பாதவர்கள்

காரணங்களைப் பொருத்து மாறுவது.

காரணங்கள்  ---

சோம்பல்

அறிவுள்ளவனை அண்டிப் பிழைத்தல் அறிவுடைமை

ஞானம்

இன்றைய நன்னிலை நாளைய குறைநிலை

பயம்

கிணறு வெட்டப் பூதம் புறப்பட்டுவிடுமோ?

அறிவின்மை

ஆகாததற்கு ஆசைப்படாதே

முயற்சித்தும் பயனின்மை

விளையாட்டு வினையாகும்

குறைநிலை மோசமாகாதிருந்தால் போதும் எனும் மனநிலை

உள்ளதைக் காப்பாற்றிக் கொள்வதே பெரும்பாடு

3

குறைநிலையிலிருந்து நன்னிலைக்கு முன்னேற முயற்சிப்பவர்கள்

உன் வாழ்க்கை உன் கையில்

4

குறைநிலையினை வென்று நன்னிலைக்கு வந்தவர்கள்

முயற்சி மெய்வருத்தக் கூலி தரும்

5

நன்னிலையிலிருந்து குறைநிலைக்குத் தள்ளப்பட்டவர்கள்

விதி வலியது

6

இரண்டையும் மாறி மாறி அனுபவிக்கிறவர்கள்

வாழ்க்கைங்கிறது ஆத்துலே ஒரு கால்: சேத்துலெ ஒரு கால்

7

குறைநிலையிலுள்ளோர் நன்னிலையிலுள்ளோரைப் பார்த்துப் பொறாமை

நீ என்ன கொம்பனா?

8.

நன்னிலையிலுள்ளோர் குறைநிலையிலுள்ளோரைப் பார்த்து ஏளனம்.

முடவன் கொம்புத் தேனுக்கு ஆசைப்படலாமா?

9

தானும் குறைநிலையிருந்தாலும் பிற குறையிலையிலுள்ளோர் முன்னேற்த் தடை செய்வோர்

என்னாலே முடியாததை நீ மட்டும்

அடைஞ்சிடுவியாக்கும்?

10

நன்னிலையிலுள்ளோர் பிற நன்னிலையிலுள்ளோரைக் குறைநிலைக்குத் தள்ளப் பார்த்தல்

என் ஏணிதான் பெரிசா இருக்கணும்.

11

தான் குறைநிலையிலிருந்தாலும் குறைநிலையிலுள்ளோருக்கு நன்னிலை நோக்கி முன்னேற உதவுதல்

அன்பர் பணி செய்ய என்னை ஆளாக்கி விட்டுவிட்டால் இன்ப நிலை தானே வந்து எய்துமே.

 

இத்தனை நிலைப்பாடுகளுக்கும் அறிவியல் தனித்தனி பதில் கூறும். ஆனால் தத்துவம் “உலகக் கண்ணோட்டம்” என்ற ஒற்றைப் பதிலில் எல்லவாவற்றையும் அடக்கும்.

ஒருவரின் உலகக் கண்ணோட்டம் அந்த ஒருவரின் நடத்தையை நிர்ணயிக்கிறது என்பதுதான் தத்துவவியலின் ஆத்திசூடி. அது தவறாக இருக்கும் பட்சத்தில் அதனை மாற்ற முடிந்தால்தான் உலகம் மாறும்.

உலகக் கண்ணோட்டம் என்பதுதான் என்ன ? “தன்னறிவுக்கு முழுமை எனத் தோன்றும் ஒன்றை நோக்கிய வாழ்நாள் நகர்வு. ஆனால் அந்த “முழுமை” ஒருவன் அனுபவத்தால் வளர்ச்சி அடைகையில் அதுவும் பின்னம்தான் என அறிய நேரிடும்போது புது முழுமை காணும் வாழ்நாள் நகர்வு கை கொள்கிறான்.” இது ஒரு தொடர்பயணம். சமுதாயம் எது நன்னிலை என நிர்ணயிக்கிறதோ அதற்கு நல்ல பிள்ளை ஆவதை முக்கியமாகக் கருதும் வரை இப்பயணம்.

தான் ஒன்றை முழுமை என நினைத்தது எப்படி பின்னம் என அறிய வந்தது என வாழும்போதே யாரும் நுண் குறிப்புச் சிட்டை (log book) வைத்துக் கொள்வதில்லை. ஒருவர் தன் உலகக்கண்ணோட்டதை

  • அறியாதிருக்கலாம்
  • அறிந்திருந்தாலும் சொல்லமாட்டாதிருக்கலாம்
  • மாறிச்  சொல்லவேண்டும் எனக் கபடமின்றி மாறிச் சொல்லலாம்
  • மாறிச் சொல்லவேண்டும் எனக் கபடத்துடன் மாறிச் சொல்லலாம்
  • சரியாகச் சொல்லலாம்.
  • சொல்ல மறுக்கலாம்.

இவைகளுக்கும் காரணம் அவரவர் உலகக் கண்ணோட்டம்தான்.

உலகக் கண்ணோட்டம் வைத்திருப்பதிலிருந்து இரு வகையினம் மட்டுமே தப்பிக்க முடியும்.

  • குழந்தைகள்
  • மூளை மற்றும் மனக் குறைபாடு உள்ளவர்கள்

இவர்களைத் தவிர தத்துவத்திலிருந்து யாரும் தப்பவில்லை.

தொடரும் ....

அறிமுக தத்துவவியல் - 1. தத்துவவியலும் அறிவியலும் - V. R. கணேஷ் சந்தர் மற்றும் K.K. கங்காதரன்

 

அறிமுக தத்துவவியல்

V. R. கணேஷ் சந்தர் மற்றும் K.K. கங்காதரன்

தொடக்கம் 30.5.2021

 1. தத்துவவியலும் அறிவியலும்

     நடப்பு யுகம் கேள்வி கேட்பதும் (critical) ஒருமை ஆள்பாங்கு உடையதும் (Individualistic) ஆகும். 'ஏன்?' இது சொல்லப்படுகிறதென்றால், வாசகர்கள்  இக்கட்டுரைகளில் கூறப்பட்டுவைகளை புரிந்துகொள்ளுதல் (understanding), ஏற்றுக்கொள்ளுதல் (accepting) ஆகியனவற்றை தங்களளவு அறிவெல்லையில் வைத்து முடிவுக்கு வர அனுமதிக்கப்படுகிறார்கள். ஒன்றைப் புரிந்து கொண்டால்தான் அதனை ஏற்பதா இல்லை ஏற்க முடியாதா என சொல்ல முடியும். எனவே, புரிந்துகொள்ளுதலே முதல் செயல். ஏற்பது (அல்லது ஏற்காதது) இரண்டாவது செயல். ஏற்றால், சுய கற்பிதமாக்கம் (self-conceptualisation) நடக்கிறது. இதனை கீழ்கண்ட ஒரு ஓட்ட வளையச் சித்திரமாகக் (cyclic flow diagram) படம் 1 ல் காணலாம்.


     இதுவே அறிவியல் கண்ணோட்டத்தில்.... படம் 2ல் கீழ்கண்டவாறு பார்க்கப்படுகிறது...


     இங்கு முக்கியமான இன்னொன்றையும் கவனிக்கவேண்டும். நடத்தை என்பது செயலா? செயலின்மையா? என்றால் கீழ்கண்ட ஓட்டவளையச் சித்திரத்தில் படம் 3ல் விளக்கம் காண்க.



    இதனைத்தான் பகவத் கீதை 4.18 ல், செயலில் செயலின்மையும், செயலின்மையில் செயலும் காண்பவன் 'யோகி' எனக் கூறப்பட்டுள்ளது.

    தத்துவத்திற்கும் அறிவியலுக்கும் உள்ள தொடர்பு நாளுக்கு நாள் முக்கியத்துவம் பெற்றுவருவதைக் காண்கிறோம். இயற்பியலாளர்கள் தத்துவவாதிகளாவதும் (ஐசக் நியூட்டன்), தத்துவவியல் அறிஞர்கள் இயற்பியல் வினோதங்களை (கபிலர், ஒளவையார்) உற்று நோக்குவதும், எதிர்பார்ப்பதும் பரவலாகி வருகிறது.

எடுத்துக்காட்டாக... 

  இயற்பியலில் கூறப்படும் “தீர்மானகரமின்மை” (Principle of indeterminacy) க் கோட்பாட்டினை விளக்க (அதாவது, ஒரு இருப்புக்குத் தோன்றுமூலம் காணப்படாவியலாது என்பது) தத்துவவியலின் துணை தேவைப்படுவதையும், தத்துவவியலில் கூறப்படுவதான இச்சா சுதந்திரம் – freedom of will – என்பதனை இயற்பியல் வழியில் ஆராயவும் துறை சார்ந்தோர் கொள்ளும் ஆர்வம் கருதத்தக்கது.

  இதனால் தத்துவவியல் என்பது ஒரேயடியாக கருத்து சார்ந்ததாய் இருப்பதும், அறிவியலின் ஜடம் சார்ந்த அடாவடித்தனமும் முடிவுக்கு வருவதான நம்பிக்கை ஏற்படுகிறது. இவ்வகையில் இன்னொரு விஷயமும் கருதற்குரியது. படைப்புப் பரிணாமக் கோட்பாட்டில் உயிரினமும் உடலும் தோன்றினமை கூறப்படுவதும், அதோடு ஒழுக்க நெறிகளும் தோன்றியிருக்கக் கூடிய வாய்ப்பும் மறுப்பின்றி பரவலாக ஏற்கப்பட்டு வருகின்றன.

  தத்துவவியலின் நோக்கமானது, ஏதேனும் ஒரு தத்துவக் கோட்பாட்டுக் கருத்து வளையத்தை (Philosophical System) விசாரிக்கும் திருப்தியைத் தருவதல்ல. ஆனால் திசை சார்ந்த சிந்தனைத் தூண்டலைlf தருவதாகும் (directed inquiry).

இக்கட்டுரைத் தொடரின் தன்மைகளாகக் கீழ்கண்டவைகளைக் கூறலாம்.

  1. இருப்புண்மையைக் கருதுவது (realistic)
  2. பன்முகத்தன்மை உடையது (Pluralistic)
  3. இறைமையை நம்புவது (Theistic)
  4. ஒழுக்கத்தை முன்னிலைப்படுத்துவது (idealistic)
  5. நம்பிக்கை மனோபாவமுடையது (Optimistic)

   இருப்புண்மையைக் கருதுவது என்றால் காட்சியுண்மையை (reality) கணக்கிலெடுத்து, தோற்றக் கற்பனையைத் (appearance) தள்ளுவதெனத் தவறாகப் புரிந்து கொள்ளப்படுகிறது. அப்படியிருக்கத் தேவையில்லை.

 தத்துவக்கோட்பாட்டு வளையங்களிடையே (philosophical systems) உள்ள ஒற்றுமையைத்தான் நாம் காணவேண்டும். இடமளிக்கும் சிந்தனை (persistent thinking) உள்ளவர்களும் சந்தேகவாதம் (cynical scepticism) கை கொள்ளாதவர்களும் வேற்றுமையிடையே ஒற்றுமையைத்தான் காண்பார்கள்.

  இடமளிக்கும் சிந்தனை (persistent thinking) என்றால், தன் சிந்தனைக் கூட்டங்களுக்கிடையே தானே மேற்கொள்ளக் கூடியதான (அது தன்னால் வந்ததோ அல்லது பிறரால் ஏற்பட்டதோ) புதுச் சிந்தனைக்கு இடம் விட்டுவைத்தல் ஆகும். வள்ளலார் “பசித்திரு” எனும்போது உடலளவு மட்டுமல்ல, மனதளவிலும் மூளையை சிந்தனையால் இட்டு நிரப்பி அடைக்காமல், 'புதுச் சிந்தனைக்கு இடங்கொடு' எனும் அர்த்தத்தில் சொல்லிருப்பாரோ?

   தத்துவவியலில் பல தத்துவக்கோட்பாட்டு வளையங்கள் (philosophical systems) உள்ளன. பழங்கால மற்றும் நவீன தத்துவங்களின் விமர்சகர்கள் அவைகளை தங்களின் விவாதப் பொருளாக ருசி காண்பதும் மையக் கருத்தாக விரும்பி ஏற்பதும் காண்கிறோம். அறிவியலில் உள்ளது போலவே, தத்துவவியலிலும் இப்போது கருத்துரு ஒன்றிப்பு (conceptual merger or convergence) நடைபெற்ற வண்ணம் உள்ளது. உதாரணம் சொல்தென்றால், பகுத்தறிவு வாதமும் அனுபவவாதமும் ((rationalism and empiricism) இயற்பியலில் (அறிவியலில்) ஜீன் பற்றிய ஆராய்ச்சியில் ஒன்றுபடவேண்டியுள்ளது. இயந்திரகதிவாதமும் உயிர்வாதமும் படைப்பு பரிணாமத்தில் ஒன்றுபடுகின்றன. கருத்துவாதமும் இயல்புவாதமும், -- ஒரு காலத்தில் இவையிரண்டும் பரம எதிரிகளாக இருந்திருந்தாலும்---, இப்போது அந்தத் தீவிரத்தனம் குறைந்து வருவதைக காண்கிறோம்.

  பிரபஞ்ச ஒழுங்குக்குப் பின்னே ஒரு ஆன்மீகச் சத்தியநெறி உள்ளதென கருத்துவாதமும் idealism, பிரபஞ்ச ஒழுங்கின் அறிவியல் உண்மை தெரிய வர வர இயல்புவாதம் naturalism சரியெனத் தோன்றுவதும் மேற்போக்குக்கு எதிரெதிர் எனக் கொண்டாலும். எதிர்காலத்தில் ஏன் ஆன்மீகச் சத்திய நெறி கண்டுபடிக்கப்பட்டு இந்தப் பிரச்னையைத் தீர்க்கக் கூடாது? வாய்ப்பு இருக்காதா?

  எல்லாமே மூலத்திலிருந்து தோன்றியதாகத்தான் கொள்ளவேண்டுமா? ஒரு மூலத்திலிருந்து தோன்றிய மூலகங்கள் தங்களிடையே கலந்து எத்தனேயோ தோற்றுவித்திருக்கலாமே?

    ஜடம்தான் வாழ்வாக, மனமாக, சமூகமாக, கலை,  அறிவியல், தொழில் நுட்பமாக மாறியிருக்கிறது. ஏனென்றால் இவ்வரிசையில் முன் சொல்லப்பட்டுள்ள எது ஒன்றும் தனக்குத் தேவைப்பட்டே தனக்கடுத்ததை ஜனித்திருக்கிறது. இவ்வாறு பிரபஞ்ச ஒழுங்கைத் தீர்மானகரமாகக் காப்பாற்றுகிறது.

 தொடரும் ..

Thursday, 27 May 2021

அன்னை தெரேசாவின் நிழல் - சிறுகதை - கு.கி.கங்காதரன்

அன்னை தெரேசாவின் நிழல்  
சிறுகதை 
கு.கி.கங்காதரன்

"உனது வாழ்நாளில் சமூகத்தொண்டு செய்தவரின் சரித்திரத்தைப் படிப்பது அல்லது பொதுச்சேவையில் ஈடுபடுபட்டிருப்பவரை ஒருமுறையாவது சந்தித்துப் பேசினால்தான் உனது பூலோக வாழ்வு அர்த்தமுள்ளதாக இருக்கும்" 

அரிதாக அன்று  'நீதிநெறி' (Moral) வகுப்பு நடந்ததுபொதுவாகக் கல்விக்கூடங்களில் வேறு எதைப்பற்றியும் சிந்திக்கவிடாமல் 'ஏட்டுக்கல்வி'யை மட்டும் அவர்களின் மனதில் ஆழமாக உழச்செய்துகொண்டிருக்கும் இக்காலத்தில் இம்மாதிரியான வகுப்புகள், மாணவர்களுக்குள் இருக்கும் மனஇறுக்கத்தைத் சற்று தளர்த்தும் என்பது ஆசிரியர்களுக்குத் தெளிவாகத் தெரிந்திருந்தாலும்கூட அதைப் பின்பற்றுபவர்கள் எத்தனை பேர் என்பது ஒரு கேள்விக்குறியே?  

தமிழாசிரியர் கந்தசாமி அந்த வகுப்பை எடுக்கப்போகிறார் என்பதைக் கேட்டவுடன் மாணவர்களுக்கு உற்சாகம் பீறிட்டது. தமிழாசிரியராய் இருப்பதால்தான் என்னவோ தமிழ்பாடம் எடுக்கும்போது அவரின் தமிழ் உணர்வோடு கலந்த உச்சரிப்பானது ஒவ்வொரு வார்த்தையும் உயிர்பெற்று உறவாடுவதைப்போல் கேட்பவர்களை மெய்மறக்கச் செய்துவிடுகிறது என்பது உண்மையோ உண்மை. இரக்கம், மனிதநேயம், அன்பு ஆகியவை அதிகமாகத் தெரியாத இன்றைய மாணவ சமுதாயத்திற்குச் சிறப்புமிக்கத் அரசியல் தலைவர்கள், சமூகசேவகர்கள், அறிஞர் பெருமக்கள், விஞ்ஞானிகள் என்று பலரின் வாழ்க்கைச் சரித்திரத்தின் மூலம் நல்வழி காட்டவேண்டும் என்கிற அளவளாவிய விருப்பம் அவருக்குள் இயற்கையாகவே இருந்துவந்தது. குறிப்பாக அவரது வெற்றியைச் சொல்லவேண்டுமானால் ஆங்கிலமே பேச விரும்பும் தனது மாணவர்களைத் தெள்ளியத் தனித்தமிழில் பேசவைத்த பெருமை அவரைத்தான் சாரும். மாணவர்களிடத்தில் அவர் அடிக்கடிச் சொல்லும் வார்த்தை 'தமிழ் கற்காதவர்கள் பேச்சுவழக்குத் தமிழில் தெரியாமல் பேசலாம். ஆனால் தமிழ்க் கற்றவர்கள் தனித்தமிழில் பேசுவதுதான் அழகு' என்பதே. அவர் ஒரு நடமாடும் போதிமரம். அவர் மூலம் கல்வியறிவு ஞானம் பெற்றுப் பெரிய அளவில் இன்று கௌரவமாய் நடமாடுபவர்கள் பலர். 

அன்றைய வகுப்பில் தனது நீண்டநாள் ஆசையான 'அன்னை தெரேசாவின் வாழ்க்கையை சுருக்கமாகவும் அதேவேளையில் மாணவர்களின் இதயத்தினுள் நுழைத்து அவர்களின் இரத்தத்தோடு கலக்கச்செய்து அவர்களையும் சமூகத்தொண்டில் நாட்டம் செய்துவிட வேண்டும்' என்கிற முனைப்போடு வகுப்பில் நுழைந்து தனது வகுப்பைத் தொடங்கினார் கந்தசாமி. உயரிய 'நோபல் பரிசு பெற்றதோடு உலகளவில் பெருமையும் புகழும் கொண்ட அன்னை தெரேசா அவர்கள், ''தன்னலம் கருதாது வாழ்நாள் முழுவதும் தனது உடல்உருகிப்போவதைப் பற்றியும், வயது தேய்ந்துபோவதைப் பற்றியும் கொஞ்சம்கூடக்  கவலைப்படாமல்   உலகத்தின் பல்வேறு இடங்களுக்குச சென்று அங்குள்ள பலத்தரப்பட்ட மக்களுக்குப் பல்வகைப் பொதுத்தொண்டுகள் செய்துவந்தார். அவர் தமது இறுதி மூச்சுவரை பசி, பிணி, நோயில் வாடிய ஏழைகளுக்காகவே தொண்டு செய்து உயிர் நீர்த்தார். அன்னைத் தெரேசாவின் இளகிய மனிதநேய மனத்தைப் பற்றி உணர்ச்சிபூர்வமாக மாணவர்களுக்கு எடுத்துரைத்தார். கந்தசாமி பேசியதைக் கேட்ட மாணவர்களில் ஒருவனான மாணிக்கத்தின் உடலும் மனமும் ஒருவிதப் புத்துணர்ச்சி பெற்றது. எத்தனையோ வகுப்புகள் இதற்குமுன் நடந்தபோதிலும் அப்போதிருந்த மனநிலையும் இப்போது இருக்கும் மனநிலையும் ஒன்றுதான் என்று சொல்லமுடியாத அளவிற்கு அவனை அறியாமலே ஏதோ ஒருவித ஞானமும் ஆற்றலும் அவன் மனதைக் கிழித்து அதனுள் நுழைந்து பத்திரமாய் உட்கார்ந்துவிட்டது.     

தொடர்ந்து கந்தசாமி "நீங்கள் மனது வைத்தால் 'தூய்மை இந்தியா'வை இப்பள்ளியின் மூலம் ஆரம்பிக்கலாம். வகுப்பறையை, பள்ளிவளாகத்தைச் சுத்தமாக வைத்துக் கொள்ளலாம். மரக்கன்றுகளை நடலாம். ஏன்? உங்கள் வீட்டையும், தெருவையும் சுகாதாரமாகப் பராமரிக்கலாம். இங்கு படிக்கும் ஏழை மாணவர்களுக்குப் பற்பல உதவிகள் செய்யலாம். அவர்கள் படும் துயரங்களைப் போக்கலாம். எல்லாவற்றிக்கும் சொந்தப்பணம் செலவழிக்கவேண்டும் என்பதில்லை. மனது இருந்தால் அன்னை தெரேசா செய்ததுபோல் பெரிய மனது படைத்த மக்களிடம் பணமோ, பொருட்களோ வாங்கி எங்கு எப்போது யாருக்கெல்லாம் சேவை தேவையோ அவர்களுக்கு உதவலாம். அதற்குப் பரந்த மனமும், உதவும் எண்ணமும், இரக்க குணமும் இருந்தாலேப் போதுமானது' என்று பலவிதப் பொதுத்தொண்டுகளை அடுக்கிக்கொண்டே போனார். அன்னைத் தெரேசா மக்களுக்குத் தொய்வில்லாமல் சேவை செய்யவேண்டுமென்பதற்காக அவர் சந்தித்த அவமானங்கள், அளவில்லாத இன்னல்களை எடுத்துச் சொல்லச்சொல்ல மாணவர்கள் அமைதியாகவும் கவனம் சிதறாமலும் கேட்டனர். 

அவையனைத்தும் கேட்ட மாணிக்கம் "ஐயா, நானும் வருங்காலத்தில் அன்னை தெரேசாபோல் ஆகவேண்டும்" என்று தனது ஆசையை வெளிப்படுத்தினான்.

அதைக்கேட்ட கந்தசாமிக்கு 'ஒருநாள் வகுப்பிற்கே தன்னால் ஒரு மாணவனை பொதுச்சேவை செய்யும் எண்ணத்தைத் தூண்டமுடிந்ததே' என்று சற்று திருப்தியடைந்தார்.

"மிக்க மகிழ்ச்சி" என்று அவனைப் பாராட்டினார். அதோடு அவனிடத்தில் 'முடிந்தால் உனது அப்பாவை நாளைச் சந்திக்கிறேன்' என்கிறத் தகவலையும் அவனிடத்தில் கூறினார்.

கந்தசாமியும் மாணிக்கத்தின் அப்பா மதியழகனும் நெருங்கிய நண்பர்கள். இருவருக்கும் தமிழின்மேல் அலாதியான பற்று உண்டு. பள்ளியில் படிக்கும்போதே பொதுத்தொண்டில் இருவருக்கு ஆர்வம் அதிகமாக இருந்ததால் தங்களால் முடிந்தளவிற்கு மற்றவர்களுக்கு உதவிகள் செய்வதில் தவறுவதில்லை. அது இன்றளவுக்கும் தொடருவதே சிறப்பு.  

வீட்டிற்கு வந்த பிறகும் மாணிக்கத்தின் மனதில் பொதுச்சேவைப் பற்றிய சிந்தனையே ஓடிக்கொண்டிருந்தது. பொதுச்சேவை செய்வதில் இவ்வளவு துன்பங்கள் இருக்கின்றனவா? என்று அப்போதுதான் உணர்ந்தான். அத்தகைய துயரங்கள் யாருக்காக எதற்காக தாங்கிக்கொள்ளவேண்டும்? எதற்காக ஏழைகளுக்கு அன்னைத் தெரேசா அவர்கள் தன்னை வறுத்திக்கொண்டு இத்தனை உதவிகள் செய்யவேண்டும் என்கிற கேள்வியும் கூடவே அவனுள் எழுந்தது. அவ்வாறு எழுந்த எண்ணங்களானது, எவ்வாறு பெரிதான நீர்குமிழி சில வினாடிகளிலே தானாக உடைவதுபோல சில நிமிடங்களிலே அவனைவிட்டு அகன்றதன் அடையாளமாக அவன் அவசரம் அவசரமாகக் கைகால் கழுவிவிட்டு நேராக டிவி (தொலைக்காட்சி)யின் முன் அமர்ந்து ரிமோட்டை (தானியக்கி) கையில் எடுத்து டக்கு டக்குவென்று சானல்களை மாற்றிக் கொண்டே இருந்தான்.

அந்தவேளையில் முக்கியச் செய்தியாக 'வானிலை அறிவிப்பு' அனைத்து சானல்களிலும்  ஒளிபரப்பாகிக்கொண்டிருந்ததுஅதில் அவனை மகிழ்ச்சியில் ஆழ்த்தும் செய்தியும் வந்தது. அதாவது 'இன்னும் இருபத்திநான்கு மணிநேரத்தில் தமிழகத்தின் பல இடங்களில் பலத்தமழைப் பெய்யக்கூடும் என்பதாலும் குறிப்பாக சென்னையை அதிவேகக்காற்றுடன் கூடிய  புயல்மழை  தாக்கக்கூடும் என்பதாலும் பள்ளிக்கல்லூரிகளுக்கு நான்கு தினங்கள் விடுமுறை  அளிக்கப்படுகின்றன'  என்கிற எதிர்பாராதச் செய்தி மாணிக்கத்திற்கு மட்டற்ற மகிழ்ச்சியைத் தந்தது. அச்செய்தியை வீட்டிலுள்ளவர்களுக்கும் கேட்கவேண்டு மென்பதற்- காகச் சப்தமாக வைத்தான்.

அச்செய்தியைக் கேட்டவுடன் சமையலறையிலிருந்து ஒருகுரல் "போச்சுடா, மறுபடியும் நாலுநாள் லீவா?  இப்படியே லீவுவிட்டுட்டே இருந்தா வாத்தியாருங்க எப்போ பாடத்தை நடத்திமுடிக்கிறது? நீங்க எப்போ பாடத்தைப் படிச்சு தேர்வு எழுதுறது?"  என்று மாணிக்கத்தின் அம்மா தன்னுடைய ஆதங்கத்தை வெளிப்படுத்தினாள்.

"அம்மா, உனக்கு என்னைத் திட்டுவதே ஒரு வேலையாகப் போய்விட்டது. எப்பொழுது பார்த்தாலும் படி, படி... இது மட்டும்தான் உனக்குத் தெரியும். படிப்பதை நான் மறக்கமாட்டேன். அதைத்தவிர எனது இலட்சியம் மக்களுக்காக ஏதாவது செய்யவேண்டும்" என்று மாணிக்கம் தன் பங்கிற்குப் பதிலளித்தான்.   

"உனக்கு லீவு விட்டாலும் விட்டாங்க, ஏண்டாப்பா சதா டிவியை வச்ச கண்ணு எடுக்காம பார்த்துக்கொண்டே இருக்கனுமா? இது உனக்கே நல்லா இருக்கா? லீவு விடுறது இதுமாதிரி பொழுதுபோக்குறதுக்கு இல்லே. பாடத்தைப் படிக்கிறதுக்கு!  ம்... உனக்கு எப்போ புத்தி வரப்போறதோ" என்று தொலைக்காட்சியில் மூழ்கியிருக்கும் மாணிக்கத்திற்குக் கேட்கும்படி வழக்கம்போல் பல்லவியைப் பாடி முடித்தாள் அவன் அம்மா கீதா.

மறுநாள் வானிலை எச்சரிக்கையின்படி சென்னையில் கொட்ட ஆரம்பித்த மழையானது, வானத்திலிருந்து வீசியெறியப்பட்ட தண்ணீர்க்குண்டுகளாய் சாலை, வீடு, வாகனங்கள், கடைகள், கட்டிடங்கள், குடிசைகள், தெருவோரத்தில் வசிக்கும் மனிதர்களை தயவுதாட்சண்யம் இல்லாமல் தாக்கிக்கொண்டிருந்தது. அச்செயல் விண்ணிற்கும் மண்ணிற்கும் நடக்கும் போர்களம்போல் காட்சியளித்தது. அதில் சிக்கிய மனிதர்கள் உட்பட பல்லுயிர்கள் என்னவென்றுச் செய்வதறியாது திணறிக்கொண்டிருந்தது. கொந்தளிக்கும் கடல்போல் அனைத்து இடங்களையும் தீவுபோல் சூழ்ந்து கொண்டிருந்ததால் மீட்புப்பணிகள் முழுவீச்சில் செய்யமுடியாதபடி கிட்டத்தட்ட அனைத்துக்கரங்களையும் கட்டிப்போட்டிருந்தது. மின்சாரம் முழுவதுமாகத்  துண்டிக்கப்பட்டிருந்தது. மழைவெள்ளம் சாலைகள் இருப்பதே தெரியாதவண்ணம் காட்டாறாய் ஆர்ப்பரித்தபடித் தறிகெட்டு ஓடிக்கொண்டிருந்தது. இந்த நிகழ்வினைச் செய்திகளாய் நேரலையாக அனைத்து வீடுகளின் சின்னத்திரையில் ஓடிக்கொண்டிருந்தன.
சென்னையில் மாணிக்கத்தின் வீடுச் சற்று மேடான பகுதியாதலால் அங்கு மழையின் தாக்கம் குறைவாகவேக் காணப்பட்டது.

இம்மாதிரி நிகழ்வு, சென்னையானது நூறுஆண்டுகளுக்கு
 முன்னால் சந்தித்ததாக ஊடகங்கள் தெரிவித்துக்கொண்டிருந்தது. அதேவேளையில் இத்தகையப் பேரிடரானது, மக்கள் நகரத்தின் தாழ்வான பகுதிகளில் பல வீடுகளைக் கட்டியதாலும், வீடுகளில் மழைநீரைச் சேமிக்கும் வசதி இல்லாமையாலும், சாலைகளில் தண்ணீரை உறிஞ்சிடாத அளவுக்குத் தார், சிமெண்ட் சாலைகள் போடப்பட்டதாலும், நீர்வடிகால் கட்டமைப்பு இல்லாததாலும்  ஏற்பட்டது? என்கிறப் பலகாரணங்களை விலாவாரியாக விவரித்துக்கொண்டிருந்தது. நல்லவேளையாக முன்னெச்சரிக்கை காரணமாகவும், அரசு மற்றும் மக்களின் ஒத்துழைப்புக் காரணமாகவும் மனித உயிர்கள் இறப்பதைக் கணிசமாகத் தவிர்க்கப்பட்டிருந்தது என்றும் தெரிவித்தது. அதைவிடக் கூடுதல் தகவலாக வாட்ஸ் ஆப், முகநூல் மூலம் பல்வேறுப் பகுதியைச் சேர்ந்த இளைஞர்கள் ஒன்றுசேர்ந்து தங்களால் இயன்ற உதவிகளைச் சென்னைப் புயலால் பாதிக்கப்பட்டவர்களுக்கு முழுவீச்சில் இறங்கி தொண்டுசெய்வதை நேரலையாக ஒளிபரப்பப்பட்டது. அதைப் பார்த்த மாணிக்கத்தின் உள்ளம் பரவசத்தில் ஆழ்த்தன.

பல பகுதியிலிருந்து வந்திருந்த இளைஞர்கள், பாதித்தவர்கள் பலருக்குப் பால், உணவுப்பொட்டலங்களை வழங்குவது, வெள்ளத்திலிருந்துச் சிலரைக் காப்பாற்றுவது, முதியோர்களைப் பத்திரமாக ஒரிடத்தில் அழைத்துச் செல்வது, மருந்தும் மருத்துவ உதவிகளும் செய்வதை நேரலையாகப் பார்த்துக்கொண்டிருந்த மாணக்கத்தின் உணர்ச்சி கொஞ்சம் கொஞ்சமாக வேகமெடுத்தது.       

சொல்லியபடி கந்தசாமி, தன் நண்பன் மதியழகனைப் பார்க்க வீட்டிற்குச்சென்றார். வீட்டுச் சூழ்நிலையை அவர் நோட்டமிட்டார். தொலைக்காட்சிப்பெட்டியில் மூழ்கியிருக்கும் தன் மாணவன் மாணிக்கம் ஒருபுறம், சமையலறையே கதியென்றுகிடக்கும் அவன் அம்மா, வீட்டுச்சாமான்ககளை ஒழுங்குபடுத்துவதற்கும், வீட்டுவேலைகளைச் செய்துப்பழகிப்போன தன் நண்பன் மதியழகன் ஆகிய எல்லோரும் அவரவர் வேலையில் சுறுசுறுப்பாக இயங்கிக் கொண்டிருந்தனர்.  

சற்று நிதானித்த கந்தசாமி "தொலைக்காட்சியைப்
 பார்த்தாயா மதியழகா? எப்படியிருந்த சென்னை! இப்படி ஆகிவிட்டது! ‘கலிகாலம் என்பது சரியாகத்தான் இருக்கின்றது! இம்மாதிரிப் புயலும், மழைவெள்ளமும் என்வாழ்நாளிலேப் பார்த்ததே இல்லை. மூலைமுடுக்குகளில் இருக்கும் யார்யாரோ போட்டிப்போட்டுக்கொண்டு பாதிக்கப்பட்டவர்களுக்குப் பல உதவிகள் செய்யும்போது பக்கத்தில் இருக்கும் நாம் அவங்களுக்காக ஏதாவது செய்யவேண்டும்
" என்று தனது ஆசையைச் சொன்னார் கந்தசாமி.

"நீ சொல்வதுச் சரிதான். ஆனால் இந்த நிலைமையில் யாரிடத்தில் எந்த உதவி கேட்டு எப்படி அதை அவங்களிடத்தில் சேர்ப்பது என்பதுதான் தெரியவில்லை?" என்று இருவரும் ஆழ்ந்த சிந்தனையில் இருந்தபோது தொலைக்காட்சியைப் பார்த்துக்கொண்டிருந்த மாணிக்கத்தின் குரல் கம்பீரமாய்க் கேட்டது. 

"வணக்கம் ஐயா. அப்பா, நீங்கள் பேசியதை நான் கேட்டேன். நீங்கள் அனுமதிக்கொடுத்தால் என்கூட படிப்பவர்கள் இப்பகுதியில் பலர் இருக்கிறார்கள். சற்றும் தாமதிக்காமல் அவர்களிடம் உணவும் உடைகளும் சேகரித்து அதை எனது நண்பனின் அப்பா வாகனத்தில் ஏற்றி பாதிக்கப்பட்டவர்களுக்கு உடனடியாக உதவிகள் பல அளிக்கலாம்" என்று மாணிக்கம் என்றைக்குமில்லாமல் இவ்வாறுப் பேசியத்தைக் கேட்டு வாயடைத்துப் போனார்கள்.

"மாணிக்கம், ஒருவரிடத்தில் உதவி பெறுவது என்பது மிகவும் கடினமானச் செயல்!" என்றார் கந்தசாமி.

"தெரியும் ஐயா! கொடுக்க நினைப்பவர்களிடத்தில் வாங்குகிறேன். அவர்களில் சிலர்
 எத்தகைய வார்த்தைகள் பேசுவார்கள்? எவ்வாறுத் தரக்குறைவாக நடந்துகொள்வார்கள் என்பது நீங்கள் சொன்னது எனக்கு ஞாபகம் இருக்கிறது ஐயா! நீங்கள் நன்னெறி வகுப்பில் போதித்த அன்னைத் தெரேசா அவர்கள் மக்களுக்குச் செய்த தொண்டுகள் பசுமரத்தாணிபோல் என்மனதில் நன்றாகப் பதிந்துவிட்டது ஐயா. என்னால் சென்னை மக்கள் படும் துன்பமும் வேதனையும் பார்த்து சும்மா இருக்கமுடியவில்லை ஐயா. சென்னையில் மழைவெள்ளத்தினால் பாதிக்கப்பட்ட மக்களுக்குத தகுந்த நேரத்தில் உதவிசெய்வதுதான் நாம் மற்றவர்களுக்குச் செய்யும் அற்புதத்தொண்டு என்று நான் கருதுகிறேன். அன்னைத் தெரேசா இருந்திருந்தால் என்ன செய்வாரோ அதை நான்செய்ய வேண்டும் என்று என்மனது துடிக்கின்றது. இதுநாள்வரை தொலைக்காட்சியில் பொழுதுபோக்கு அம்சங்களைப் பார்த்துப்பழகிப்போன எனக்கு இன்று காலை மழையால்பாதித்த மக்களை நேரலையாகப் பலஊடகங்களில் பார்த்தபின் எனக்கு அன்னைத் தெரேசா அவர்களின் தொண்டு நினைவுக்கு வந்தது
. போரில் காயமடைந்தவர்களுக்கு அவர்கள் செய்த தொண்டு இன்றளவும் உலகம் பேசிக்கொண்டு இருக்கின்றது. அதுபோல் நானும் என்னால் முடிந்த அளவுக்கு அவர்களுக்கு ஏதாவது உதவி செய்தேதீர வேண்டும் என்று என்மனம் சொல்கிறது" என்று தனது உணர்வுகளை மழையாகக் கொட்டினான்.  

'மாணிக்கம்தான் இவ்வாறு பேசுகிறானா?' என்று இருவருக்கும் சந்தேகம் இருக்கத்தான் செய்தது.

"கந்தசாமி, நம்ம மாணிக்கம் ஏதோ ஒரு வேகத்தில் இருக்கிறான். புத்தபகவான் ஞானம் பெற்றதுபோலல்லவா துள்ளுகிறான். எனக்கென்னமோ நீதான் கண்ணபிரான் அர்சுனனுக்கு உபதேசம் செய்ததுபோல் ஏதாச்சும் சொல்லியிருப்பாய் என்று நினைக்கிறேன். எப்படியோ இந்த அளவுக்கு இவன் பேசுவதே எனக்குப் பெருமையாய் இருக்கின்றது" என்று மதியழகன் அதிசயமாய்ப் பேசினார்.

"மதியழகா, அவனைத் தடைசெய்யாமல் பாதித்தவர்களுக்குத் தொண்டு செய்ய மாணிக்கத்திற்கு அனுமதி கொடுப்போம். அவனுக்குத் துணையாய் நாம் இருப்போம்" என்று கூறியதுதான் தாமதம் மாணிக்கம் மக்களிடமிருந்து பல உதவிகளைச் சேகரிக்கச் சிட்டாகப் பறந்தான்.

ஒருமணி நேரம், இரண்டுமணி நேரம் என்று நான்குமணி நேரம் கடந்தது. கையைப் பிசந்தபடி கந்தசாமியும், மயில்சாமியும் இங்கும் அங்குமாய் நடந்துகொண்டிருந்தனர். 'தன் மகனுக்கு என்னானதோ' என்று பதறியபடி புலம்பினாள் கீதா. இந்நிலையிலும் மூவரும் நேர்மறை நம்பிக்கையோடு இருந்தனர்.

"மாணிக்கம் கட்டாயம் நல்ல செய்தியோடு வருவான்' என்று ஆறுதல் சொல்லிக்கொண்டிருந்தார் கந்தசாமி.

சிலமணிநேரத்திற்குப் பிறகு, மாணிக்கம் எங்கு எப்படி யாரித்தில்லெல்லாம் உதவி கேட்டானோ என்றுத் தெரியவில்லை. அவனின் ஆர்வமும் வேகமும் தொண்டுசெய்யவேண்டும் என்கிற எண்ணமும் எல்லோரும் எண்ணியபடியைவிடவும் கூடுதலாக அனைத்தையும் எளிதாகச் செய்யவைத்தது. இன்றுதான் மக்களின் எண்ணத்தை நன்றாகத் தெரிந்துகொள்வதற்கு தனக்கு நல்லதொரு சந்தர்ப்பம் கிடைத்தது என்றே எண்ணினான்.

"யாரு, மதியழகன் மகன் மாணிக்கமா? பரவாயில்லையே. உன்னைப்போல மாணவங்க சமூகசேவை செய்றது ரொம்பப் பெருமையா இருக்கு. எங்களாலே நேரடியா பாதிக்கப்பட்டவங்களுக்கு உதவிசெய்ய முடியலேன்னாலும் உன் மூலமாச் செய்றது நாமக் கொடுத்து வச்சிருக்கனும். எங்களான உதவிங்க இதோ' என்று பலரும் போட்டிப்போட்டுக்கொண்டு கொடுத்ததை கண்ட மாணிக்கம், மக்களுக்கும் ஈரம் உண்டு என்பதை  உணர்ந்துகொண்டான்.

உணவும் உடையும் நிரம்பிய படி வாகனத்தின் முன்கண்ணாடியில் 'வெள்ள நிவாரணப் பணி வாகனம்' என்கிற வாசகம் தாங்கிய பதாகையுடன் வந்து சேர்ந்த மாணிக்கத்தைப் பார்த்த மதியழகன், கந்தசாமி, கீதா மற்றும் தெருவில் உள்ள அனைவரும் வியப்பாகப் பார்த்ததோடு அவர்களும் பல உதவிகள் செய்தனர். 

"ம்.. மாணிக்கம் செய்த வேலை! மகத்தானது. இதைக்கொண்டு பாதிக்கப்பட்ட சிலருக்காவது உடனே உதவ வேண்டும்" என்று  சற்றும் தாமதிக்காமல் அம்மூவரும் வாகனத்தில் அமர, வாகனம் வெள்ளம் பாத்தித்த திசையை நோக்கிப் பறந்தது.
                          
&&&&&&&&&&&&&&&&&&&&&&&&&&&&&&